Гэнры Лангфэла
Вершы
Пераклад: Алена Таболiч
Страла i песня
Пусцiў стралу я у паветра
Панесла яе ўпрочкi ветрам,
Упала недзе, але ж дзе?
Не змог убачыць я яе.
Пусцiў i песню я ў паветра,
Яе таксама знесла ветрам.
Узнiкла дзесьцi, але ж дзе?
Не змог нiхто дагнаць яе.
Ў магутным дубе неяк раз
Стралу знайшоў я ў познi час,
А песню, музыку радкоў,
Знайшоў у сэрцах сябрукоў.
Поўдзень у лютым
Дзень ужо канчаецца,
Ноч апускаецца,
Балота яшчэ спiць,
Рака не шумiць.
Праз попел аблокаў
У небе высока
Чырвонае сонца
Мне свецiць бясконца.
Зноў снег пачынаецца,
Усё хутка хаваецца
Пад белаю ватаю
За нашаю хатаю.